ഈണം

ഈണം 2011 - ഒരു അവലോസുണ്ട..!

2011-09-14T03:51:00.000-07:00

ഇപ്രാവശ്യത്തെ ഓണം ആൽബത്തിന്റെ ചിന്തകൾ തുടങ്ങിയപ്പോഴേ ഞാൻ പറഞ്ഞതാണ്..ആളുകൾ ഇതൊന്നും മൈൻഡ് ചെയ്യാൻ പോകുന്നില്ല. ഇന്റർനെറ്റിൽ സൗജന്യമായി പൈറേറ്റഡ് ആയി ലഭ്യമാവുന്ന എ ആർ റഹ്മാന്റെ പുത്തൻ ആൽബങ്ങൾ വരെ കേൾക്കാൻ ആളുകൾക്ക് സമയം കിട്ടുന്നില്ല.സോഷ്യൽ നെറ്റ്വർക്കിംഗ് സൈറ്റുകളിലെ വല്ലാത്ത തിരക്കിലാണ്. അപ്പോഴാണ് ഓണം കീണം എന്നൊക്കെപ്പറഞ്ഞ് ഒരോരുത്തന്മാർ സൗജന്യ സംഗീതം എന്ന ലേബലിൽ ഇറങ്ങുന്നത്. പുത്തൻ ആൽബങ്ങളിലേയും സിനിമകളിലേയും പാട്ടുകൾ ഡൗൺലോഡ് സൗജന്യമായി ഡൗൺലോഡ് ചെയ്യാൻ പറ്റുമ്പോൾ എന്താണിവർ പറയുന്ന സ്വതന്ത്രസംഗീതം ?

എന്തായാലും പത്ത് പാട്ടുകളുമായി ആൽബമിറങ്ങി.ആദ്യത്തെ ദിവസങ്ങളിൽ പ്രതീക്ഷിച്ചത് പോലെയൊക്കെ സംഭവിക്കുന്നുണ്ട്.പലരും കണ്ട ഭാവം നടിച്ച മട്ടില്ല. ഓൺലൈനിൽ സന്തോഷ് പണ്ഡിറ്റിന്റെ പാട്ടിനെപ്പറ്റി കൂലങ്കഷമായി ചർച്ച ചെയ്യുന്നവർ പോലും ഇത്തരമൊരു ആൽബം വന്നത് കണ്ട മട്ടില്ല. ആഹ..പ്രവചനം ശരിയായ മട്ടിൽ ഇതിന്റെ അണിയറയിൽ ഇത്തവണ പ്രധാനമായി നിന്നിരുന്ന നിശിയെ തെറി പറഞ്ഞ്, മേലാൽ ഇത്തരമൊരു പരിപാടിക്കിറങ്ങിയേക്കരുത് എന്നൊക്കെയായി പിറ്റേന്നേക്കയക്കാൻ ഒരുഗ്രൻ മെയിലൊക്കെ ഡ്രാഫ്റ്റ് ചെയ്ത് വച്ചു.പിറ്റേന്നെണീറ്റ് നോക്കുമ്പോൾ ഒന്ന് രണ്ട് കമന്റുകളൊക്കെ വന്നിട്ടുണ്ട്..സ്റ്റാറ്റിസ്റ്റിക്സെടുത്തു നോക്കി..പ്രതീക്ഷയുടെ ഒരു ചെറുനാമ്പ് കിളിർത്ത് വരുന്നുവോന്നൊരു സംശയം.പതുക്കെപ്പതുക്കെ ആളുകൾ പാട്ടുകൾ കേട്ട് തുടങ്ങി.കേട്ടവരൊക്കെ നല്ലത് മാത്രം പറഞ്ഞ് പറഞ്ഞ് ഓണത്തിന്റെ ആൽബം ഇന്റർനെറ്റിലൂടെ പയ്യെ ഒഴുകാൻ (സ്ട്രീം ചെയ്യാൻ) തുടങ്ങി.പിന്നെക്കണ്ടത് ഒരു കൂട്ടം മാധ്യമങ്ങളും ചില സുഹൃത്തുക്കളും ഇതിനെ പ്രോത്സാഹിപ്പിക്കുന്നതായിരുന്നു. ഇന്നത് പത്താം ദിവസം പൂർത്തിയാക്കിയിരിക്കുന്നു. ആറായിരത്തിൽത്താഴെ യുണീക് സന്ദർശകർ മാത്രമാണ് വെബ്ബ് സന്ദർശിച്ചത്. പക്ഷേ മുൻപെങ്ങുമുണ്ടാവാത്ത വിധമുള്ള ചില കണക്കുകൾ കണ്ടാണ് സത്യത്തിൽ ഞെട്ടിപ്പോയത്..

വെറും 64 കെബി സ്ട്രീമുള്ള കുഞ്ഞൻ റേഡിയോ വഴി എഴുപത്തിയൊന്ന് രാജ്യങ്ങളിലായി ആളുകൾ കേട്ട് ട്രാൻസ്ഫർ ചെയ്ത ഡാറ്റാ 46 ജിബി. വെറും 64 കെബി സൈസിൽ ആൽബത്തിലെ മുഴുവൻ പാട്ടുകളും കണക്കാക്കിയാൽ 25 എംബിയിൽ താഴെ മാത്രമേ വരൂ. വെബ്ബ് വഴി 50 എംബി സൈസുള്ള ആൽബം സ്ട്രീം ചെയ്തതും ഡൗൺലോഡിയതും

വക 29 ജിബി . പത്ത് ദിവസം പൂർത്തിയാകുമ്പോൾ ആകെ മൊത്തം ആൽബം ഓൺലൈനിൽ ട്രാൻസ്ഫർ ചെയ്തത് 75-80 ജിബി. രണ്ട് ലക്ഷത്തിനടുത്ത് വെബ്ബ് ഹിറ്റുകൾ. ആകെ ആറായിരത്തിൽത്താഴെ ആളുകളിലേക്ക് മാത്രമാണ് ഈ വിവരം ചെന്നെത്തിയിട്ടൂള്ളത്. ആ ഇട്ടാവട്ടത്തിൽക്കിടന്ന് കറങ്ങിയ ഈ ആൽബത്തിന് സ്വപ്നതുല്യമായ ഒരു കണക്കാണത്. ഇതു വരെ സൈറ്റിനു ലഭിച്ചത് 500 ലേറെ കമന്റുകൾ,1100ലേറെ ഫേസ്ബുക്ക് ലൈക്ക് & ഷെയറൂകൾ. ഏറെ പ്രതീക്ഷയർപ്പിച്ച,സുഹൃത്തുക്കൾ ഇതേറ്റെടുക്കുമെന്ന് കരുതിയ ഗൂഗിൾ ബസ്സിലും പ്ലസ്സിലുമൊക്കെയാണ് ഇത്തവണ ഏറ്റവും തണുപ്പൻ പ്രതികരണം കിട്ടിയതെന്ന് പറയാതെ വയ്യ. പത്രമാധ്യമങ്ങളാണ് ഇത്തവണ അദ്ഭുതപ്പെടുത്തിയ വേറൊരു കൂട്ടർ. മാതൃഭൂമിയും കലാകൗമുദിയും മാധ്യമവും മെട്രോ വാർത്തയും ചന്ദ്രികയുമൊക്കെ അവരുടെ സ്പെഷ്യൽ പതിപ്പുകളിൽ ഒരു ഹാഫ് പേജ് തന്നെ ഈണത്തേപ്പറ്റിയും അതിന്റെ തുടക്കത്തേപ്പറ്റിയുമൊക്കെ എഴുതി.ജീവൻ ടിവിയിലെ വാർത്ത കണ്ട് അനേകം ആളുകൾ പാട്ടുകൾ കേട്ടു.ഓൺലൈൻ മാധ്യമങ്ങളായ മലയാളവും,നാലാമിടവും,ബൂലോകം ഓൺലൈനും നമ്മുടെ ബൂലോകവുമൊക്കെ ഈണത്തെക്കുറിച്ച് എഴുതാൻ സന്മനസ് കാണിച്ചു. എല്ലാ വാർത്തകളുടേയും കോപ്പി ഈ പേജിൽ പ്രസിദ്ധീകരിച്ച് കാണാം.

എഴുതിവന്നത് എങ്ങനെ കൺക്ലൂഡണമെന്ന് പിടികിട്ടുന്നില്ല.അതിനാൽ ഇങ്ങനെ തന്നെ അങ്ങ് പോട്ടെ.:). ഇത്തരമൊരു സംരംഭത്തിനെ ആദ്യമായിക്കണ്ടപ്പോൾത്തന്നെ കൂടെ നിന്നവർക്കും ഇതിനേപ്പറ്റി അറിയാമായിരുന്നിട്ടും ആദ്യം കേൾക്കുന്ന അതിശയത്തോടെ പ്രോത്സാഹിപ്പിച്ചവർക്കും അഭിവാദ്യം അർപ്പിച്ചു കൊണ്ട് ഒരു കാര്യം മാത്രം പറഞ്ഞ് നിർത്തട്ടെ. ഇതേവരെ ഒരു കുട്ടിക്കളി മോഡലിൽ പരീക്ഷണാടിസ്ഥാനത്തിൽ കണ്ടിരുന്ന ഈണത്തിനെ,ദാനം കിട്ടിയ പശുവിന്റെ പല്ലുകളെണ്ണിത്തുടങ്ങുന്നത് പോലെ,മുഖ്യധാരയിൽ ലക്ഷങ്ങൾ മുടക്കിയുണ്ടാക്കിയെടുത്ത പാട്ടുകളുമായി താരതമ്യം ചെയ്യാൻ തുടങ്ങിയിട്ടുണ്ട് എന്നത് ഒരു പക്ഷേ ഇതിന്റെ പിന്നണിയിൽ നിൽക്കുന്നവർക്ക് ഏറെ സന്തോഷമുണ്ടാക്കുന്നുണ്ട്.കൂടുതൽ ഉത്തരവാദിത്തത്തോടെ നല്ല പാട്ടുകൾ ഉണ്ടാക്കിയെടുക്കാൻ ഈ സംഘം ബാധ്യസ്ഥരാവുകയാണോ എന്ന് തോന്നിപ്പിക്കുന്നവയാണ് ഏറിവരുന്ന ഈ പ്രതികരണങ്ങളെങ്കിലും ശ്രോതാക്കളുടെ ഒരു ചെറിയ സർക്കിളിൽ മാത്രം ഈണം നിന്നു പോവുന്നു എന്നുള്ളതാണ് പ്രധാനം പ്രശ്നം.എങ്കിലും പോരായ്മകളൊക്കെ കഴിവതും പരിഹരിച്ച്, കൊമേഷ്സ്യൽ വിപണിയുടെ കെട്ടുപാടുകളില്ലാതെ,പൈറസിയുടെ പ്രശ്നങ്ങളില്ലാതെ, ആർക്കും സ്വതന്ത്രമായി ഡൗൺലോഡ് ചെയ്തെടുക്കാൻ പാകത്തിന് ഇനിയും ഈണം ആൽബങ്ങൾ പുറത്ത് കൊണ്ടൂവരാനുള്ള ഭാരിച്ച ബാധ്യത തോളിലേറ്റിക്കൊണ്ടാവും ഇത്തവണത്തെ സാംഘാംഗങ്ങൾ മടങ്ങുന്നത്.

ഈ പാട്ടുകളോ,ഇത്തരമൊരു ചിന്തയോ,സംരംഭമോ ഒക്കെ ഇഷ്ടമായതിനാൽ ഇതിനെ ആറായിരത്തിനു പുറത്തേക്ക് എത്തിക്കാൻ സന്മനസ് കാണിക്കുന്ന ഒരോരുത്തർക്കും ഈണം ടീമിന്റെ പേരിൽ നന്ദിയുണ്ട്.നിസ്വാർത്ഥമായി ഇതിലെ ഒരോ ചെറു ചലനത്തിനും അണിചേർന്ന കലാകാരന്മാർക്കും ഇതിനെ ഒരു സ്വകാര്യസ്വത്തായി കണക്കാക്കിയ പ്രിയസ്നേഹിതർക്കും ഒരിക്കൽ കൂടി നന്ദി പറഞ്ഞ് കൊണ്ട് ഒരാൾക്കായി എഴുതി വച്ചിരുന്ന തെറി ഡിലീറ്റാനായി ഞാനും നൂറേൽ ഓടട്ടെ :)

ഈണത്തിനു വേണ്ടിയുള്ള വ്യക്തിപരമായ കുറിപ്പ് - കിരൺ

ഈണത്തിന്റെ ഈ വർഷത്തെ ഓണസമ്മാനം “ഓണം വിത്ത് ഈണം 2011”

2011-09-03T22:42:00.000-07:00

ഒരു കൂട്ടം സംഗീത പ്രതിഭകളെ അണിനിരത്തിക്കൊണ്ട് ഈണം പതിവുപോലെ നിങ്ങളുടെ മുൻപിലേക്ക് ഒരു പിടി ഓണപ്പാട്ടുകളുമായി എത്തുകയാണ്. കഴിഞ്ഞ വർഷത്തെ ഗാനങ്ങൾ ആസ്വദിച്ച, അഭിപ്രായങ്ങൾ അറിയിച്ച എല്ലാ മലയാള സംഗീത സ്നേഹികൾക്കും ആദ്യമേ നന്ദി പറഞ്ഞുകൊള്ളട്ടേ. അവകാശവാദങ്ങളൊന്നും തന്നെയില്ല. പതിവുപോലെ ഇത്തവണയും അഭിപ്രായങ്ങൾ നിങ്ങൾക്കു വിടുന്നു...ഈ സരംഭം നിങ്ങൾക്ക് ഇഷ്ടമായെങ്കിൽ പങ്കു വയ്ക്കൂ..അത് മാത്രമായിരിക്കാം ഇതിന്റെ പിന്നണിയിൽ അണിനിരന്ന കലാകാരന്മാർക്കുള്ള ഓണസമ്മാനം.

ഈണത്തിന്റെ ഈ ഓണം ആൽബം ഈ അടുത്ത കാലത്ത് നമ്മെ വിട്ടു പിരിഞ്ഞ, മലയാളികൾക്ക് ഒരിക്കലും മറക്കാനാവാത്ത ഗാനങ്ങൾ സമ്മാനിച്ച, സംഗീത സംവിധാന രംഗത്തെ അതുല്യ പ്രതിഭയായിരുന്ന ശ്രീ ജോൺസൻ മാഷിനുള്ള ഞങ്ങളുടെ ആദരാഞ്ജലികൂടിയാണ്.

സ്വന്തം പി.സിക്കു മുന്നിൽ ഇരുന്നുമാത്രം പാടി റെക്കോഡ് ചെയ്തു പരിചയമുള്ള കുറേ ഗായകരേയും സംഗീത സംവിധാനത്തെക്കുറിച്ച് സാമാന്യാവബോധം മാത്രമുണ്ടായിരുന്ന കുറേ മൂളിപ്പാട്ടുകാരെയും തന്റെ ബ്ലോഗിൽ കിട്ടുന്ന സമയത്തിന് വല്ലതും കുത്തിക്കുറിച്ചു വയ്ക്കുന്ന എഴുത്തുകാരെയും കൂട്ടിയിണക്കി ഒരു പരീക്ഷണമെന്ന നിലയിൽ തുടങ്ങിയ ഈ കൂട്ടായ്മയുടെ നാലാം ഗാനസമാഹാരം ചുരുങ്ങിയ സമയത്തിനുള്ളിൽ തയ്യാറാക്കി ഇവിടെ കാഴ്ചവയ്ക്കാനായതിൽ പറഞ്ഞറിയിക്കാനാകാത്ത സന്തോഷമുണ്ട്. മുഖ്യധാരയിൽ നിന്നും അടർന്നുമാറി ഇന്റെർനെറ്റിന്റെ സാദ്ധ്യതകൾ പരമാവധി ഉപയോഗപ്പെടുത്തി മലയാളത്തിനു മാത്രമായി ഒരു സമാന്തര സംഗീതധാരയ്ക്ക് നെറ്റ് ലോകത്ത് തുടക്കം കുറിക്കാനായതിലും അത് തുടർന്നുകൊണ്ടു പോകാൻ കഴിയുന്നതിലും അത്യധികമായ അഭിമാനവുമുണ്ട്. അതേ പോലെ ഞങ്ങൾ ഈവർഷവും അണിയിച്ചൊരുക്കിയ ഈ ഗാനസമാഹാരത്തിലെ ഗാനങ്ങൾ സശ്രദ്ധം ശ്രവിച്ച് നിങ്ങളുടെ വിലയേറിയ അഭിപ്രായങ്ങൾ അറിയിക്കണമെന്ന് അഭ്യർത്ഥിക്കുന്നു. പുതുഗായകർക്കായി എം3ഡിബി അണിയിച്ചൊരുക്കിയ കുഞ്ഞൻ റേഡിയോ വഴിയാണ് ആദ്യത്തെ രണ്ട് ദിവസങ്ങളിൽ ഈ ആൽബം പ്രക്ഷേപണം ചെയ്യപ്പെടുന്നത്.

ഒരോ പാട്ടും വിശദമായി കേൾക്കാൻ സന്ദർശിക്കു http://onam.eenam.com/.

“ഈണം” - നെറ്റില്‍ നിന്ന് പാട്ടിന്റെ പുതുവെളിച്ചം...

2010-09-23T00:59:00.000-07:00

ഈണത്തെക്കുറിച്ചും ഓണം വിത് ഈണം – 2010 ആൽബത്തെക്കുറിച്ചും മുംബൈ മലയാളി ഡോട് കോമിൽ…

http://mumbaimalayali.com/eenam വായിച്ച് നിങ്ങളുടെ വിലയേറിയ അഭിപ്രായം രേഖപ്പെടുത്തുക

നെറ്റില്‍ നിന്ന് പാട്ടിന്റെ പുതുവെളിച്ചം...

ഒരു ഗാനരചയിതാവ് എഴുതിയ പാട്ടിന് അനുയോജ്യമായ ഈണം ഒരു സംഗീത സംവിധായകന്‍ നല്കുന്നു. പിന്നെ പാട്ടിനു പറ്റിയ ശബ്ദമുള്ള ഗായിക / ഗായകനെക്കൊണ്ട് പാടിക്കുന്നു. ഈ പഴയ ശൈലി ഇപ്പോള്‍ അപൂര്‍വ്വമായി. ഇപ്പോള്‍ മിക്ക ഗാനങ്ങളും സംഗീതസംവിധായകന്‍ ഈണമിട്ട ശേഷമാണ് ഗാനരചയിതാവിന്റെ ജോലി ആരംഭിക്കുന്നത്. പക്ഷേ, പിന്നിടുള്ള പരിപാടിയെല്ലാം ഒന്നുതന്നെ.

എന്നാല്‍, ‘ഈണം‘ എന്ന സംഗീതസ്നേഹികളുടെ ഇന്റര്‍നെറ്റ് കൂട്ടായ്മ പതിവുവഴക്കങ്ങളൊക്കെ മാറ്റിപ്പണിയുന്നു. ഗാനരചന ലോകത്തിന്റെ ഒരു കോണില്‍നിന്നും സംഗീതസംവിധാനം മറ്റൊരു കോണില്‍ നിന്നും. പാട്ടുകാര്‍ പല രാജ്യങ്ങളില്‍ നിന്ന്. വെബ്ബ് ലോകത്തിന്റെ വലക്കൂടാരത്തില്‍ മലയാളികള്‍ തീര്‍ക്കുന്ന വിസ്മയം.

ലോകത്തെമ്പാടും സംഗീതത്തെയും മലയാളത്തെയും സ്നേഹിക്കുന്ന മലയാളികൾ ഇന്നുമുണ്ടെന്ന് ഈണം തെളിയിക്കുന്നു. പരമ്പരാഗതമായ വഴികൾക്കപ്പുറം സംഗീതനിർമ്മാണത്തിന് പുതിയ സാദ്ധ്യതകളുണ്ടെന്നും. ലോകത്തിന്റെ പല ഭാഗങ്ങളിൽ നിന്ന് നിർമ്മാണം പൂർത്തിയാക്കി ഈ വർഷം ഓണത്തിനു പുറത്തിറക്കിയ ഗാനങ്ങൾ ഇന്റർനെറ്റിൽ സൌജന്യമായി ആർക്കും ഡൌൺ‌ലോഡ് ചെയ്യാവുന്ന നിലയിലാണ് പ്രസിദ്ധീകരിക്കപ്പെട്ടത്. പൈറസിയുടെ നൂലാമാലകളില്ലാതെ സംഗീതം ആസ്വാദകരിലെത്തുന്നു, അതും സൌജന്യമായി

തുടർന്നു വായിക്കുക....

ഓണം വിത്ത് ഈണം 2010 - ആൽബം റിലീസ്

2010-08-17T10:03:00.000-07:00

ലോകത്തിന്റെ ഏതുകോണിലായാലും ജാതിമത ഭേദമെന്യേ മലയാളികൾ ആഘോഷിക്കുന്ന ശാന്തിയുടേയും സമത്വത്തിന്റേയും ഉത്സവമായ നമ്മുടെ ഓണത്തിനു തുടക്കമാവുകയാണ്. പാവപ്പെട്ടവനെന്നോ പണക്കാരനെന്നോ ഉള്ള വേർതിരിവുകൾക്കപ്പുറത്ത് മാനുഷരെല്ലാരും ഒന്നായി രുചിസമൃദ്ധമായ സദ്യവട്ടങ്ങൾക്കായുള്ള ഒരുക്കങ്ങൾ തുടങ്ങിക്കഴിഞ്ഞു. ഈ ശുഭവേളയിൽ കഴിഞ്ഞ വർഷത്തേപ്പോലെ തന്നെ ഈണം നിങ്ങൾക്കായി ഗാനസദ്യയൊരുക്കുകയാണ്. അന്നു നിങ്ങൾ നൽകിയ പ്രചോദനത്തിൽ നിന്നും കൂടുതൽ ആത്മവിശ്വാസമുൾക്കൊണ്ട് പരസ്പരമറിയാതെയും കാണാതെയും ഇന്റർനെറ്റ് എന്ന വെർച്വൽ ലോകത്തിലൂടെ ഒന്നു ചേർന്ന കലാകാരന്മാരുടെ കഴിഞ്ഞ രണ്ടുമാസത്തെ കഠിനപ്രയത്നങ്ങൾ ഒൻപത് ഗാനങ്ങളായി നിങ്ങളുടെ മുന്നിലെത്തുകയാണ്. മുൻ‌കാലങ്ങളിൽ നിങ്ങൾ പകർന്ന സ്നേഹവും നിർദ്ദേശങ്ങളും പിന്തുണയും ഇതിനുമുണ്ടാകണമെന്ന് സവിനയം അഭ്യർത്ഥിക്കുന്നു.

ഏവർക്കും നന്മനിറഞ്ഞ ഓണാശംസകൾ നേർന്നുകൊണ്ട്

ഈ വർഷത്തെ 9 ഗാനങ്ങൾ പങ്ക് വയ്ക്കുന്നു.

(ഗാനങ്ങൾ കേൾക്കാൻ www.onam.eenam.com സന്ദർശിക്കുക)

Add caption

Merry Christmas & Happy New Year

2009-12-24T07:58:00.000-08:00

Yesunayakaa...
Lyrics & Music : Nisikanth Cheriyanadan Singer : Rajesh Raman

യേശുനായകാ, ദൈവ
സ്നേഹ ഗായകാ...
നിണമണിയും തിരുവടിതൻ
അൾത്താരമുന്നിൽ
കുമ്പസരിക്കുന്നിതാ..., ദിവ്യ
കുർബാന കൊള്ളുന്നിതാ...

കാലിത്തൊഴുത്തിൽ പിറന്നൂ, ആരും
കാണാത്ത സ്നേഹം നീ തന്നു
ദൈവത്തിൻ കാരുണ്യമായി, കേഴും
മർത്ത്യന്റെ കണ്ണീർ തുടച്ചു
ഗാനങ്ങൾനിൻ പാടുമ്പൊഴെൻ (2)
സ്മരണകളിൽ തിരുജനനം
കതിരണിയും നേരം
നിർവൃതികൊള്ളുന്നിതാ, ആത്മ
ശാന്തിയിൽമുങ്ങുന്നു ഞാൻ...

മാലാഖമാരന്നുപാടീ, നിന്നെ
വാനോളമാരാവിൽ വാഴ്ത്തീ
രാജാവുനീയെന്നു ചൊല്ലീ, ദൈവ
രാജ്യം പോലീഭൂമി മാറീ
തുണയാകുവാൻ കനിയില്ലയോ (2)
തിരുസവിധേ മമപിഴകൾ
ഏൽക്കുന്നുദേവാ
എൻ വിളികേൾക്കണമേ, എന്നെ
നേർ വഴികാട്ടേണമേ...

Sankeerthanam
Lyrics : Nisikanth Cheriyanadan Music : Bahuvreehi Singer : Kiranz

സങ്കീർത്തനം ദേവ സങ്കീർത്തനം
സങ്കീർത്തനം.... ദേവ സങ്കീർത്തനം പാടി വാഴ്ത്തിടാം (2)
മഞ്ഞുപെയ്യുമീ പുണ്യരാത്രിയിൽ ദേവഗാ.നമാ.ലപിച്ചിടാം
സങ്കീർത്തനം.... ദേവ സങ്കീർത്തനം പാടി വാഴ്ത്തിടാം

ശാന്ത രാവിൽ വന്നൂ മാലാഖമാർ കണ്ടൂ ആദിവ്യ രൂപം (2)
പുൽക്കുടിലിൽ പൂത്ത പൊൻ താരമായവൻ ശ്രീയേശു നായകൻ
കാൽ‌വരിക്കുന്നിലെക്കാരുണ്യമായൊരുനാൾ വന്നു പിറന്ന ദിനം
മെറിക്രിസ്മസ് , മെറിക്രിസ്മസ്.. , മെറിക്രിസ്മസ്& ഹാ‍പ്പി ന്യൂയിയർ
മെറിക്രിസ്മസ് , മെറിക്രിസ്മസ്.. വിഷ്യൂ-ഹാപ്പീ ന്യൂ ഇയർ..

കണ്ണുനീർക്കണങ്ങൾ തേൻ‌തുള്ളിയായ് ദുഃഖം പൂനിലാ പ്പാലായ് (2)
ജീവിതമാകുമീകൂരിരുൾവീ.ഥിയിൽ എന്നും നയിക്കേണമേ
നേരുന്നു ഞങ്ങളീ ഭൂമിയിൽ നാഥനേ നന്ദിയോടാശംസകൾ
മെറിക്രിസ്മസ് , മെറിക്രിസ്മസ്.. , മെറിക്രിസ്മസ്& ഹാ‍പ്പി ന്യൂയിയർ
മെറിക്രിസ്മസ് , മെറിക്രിസ്മസ്.. വിഷ്യൂ-ഹാപ്പീ ന്യൂ ഇയർ..

ഈണത്തിനൊരു വീഡിയോ..!!

2009-12-03T01:05:00.000-08:00

ഈണത്തിലെ പാട്ടുകൾ എല്ലാവരും കേട്ടിട്ടുണ്ടാകുമല്ലോ.പക്ഷേ ഈണത്തിലെ പാട്ടിനൊരു ഫുൾ വീഡിയോ ആദ്യമാവും.നവദമ്പതികളുടെ മൗനാനുരാഗം ഈണത്തിലെ മൗനാനുരാഗത്തിന് ദൃശ്യമാവുന്നു.

ആരാണീ നവദമ്പതികളെന്നറിയാൻ ഇവിടെ നോക്കുക.

മലയാളമനോരമയിൽ

2009-08-30T13:06:00.000-07:00

ചിത്രത്തിൽ ക്ലിക്കി വലുതാക്കി കാണുക.

ഈണം വിത്ത് ഓണം എന്ന ആൽബത്തിനേപ്പറ്റി മലയാള മനോരമയിൽ എഴുതി കൂടുതൽ ആൾക്കാരിലേക്ക് ഫ്രീ മ്യൂസിക് എന്ന ആശയം എത്തിച്ച സുനീഷിനു നന്ദി. കോപ്പി അയച്ചു തന്ന യാരിദിനും നന്ദി.ഈണത്തിനു കിട്ടിയ ഒരു ഓണസമ്മാനമായി ഇതിനെ കാണുന്നു.

ഓണം വിത്ത് ഈണം ആല്‍ബം റിലീസ്..!!

2009-08-27T06:35:00.000-07:00

പ്രിയരേ..ഈണത്തിന്റെ ഓണപ്പാട്ടുകൾ പുറത്തിറങ്ങി.ഓണം പ്രമേയമാക്കിയ ഒരു കൂട്ടം ലളിതഗാനങ്ങളാണ് ഇത്തവണ ആൽബത്തിൽ ഉൾപ്പെടുത്തിയിരിക്കുന്നത്. കേൾക്കുക.അഭിപ്രായമറിയിക്കുക..!
ചിത്രത്തിൽ ക്ലിക്ക് ചെയ്താൽ ഈണത്തിന്റെ ഓണം വിത്ത് ഈണം എന്ന വെബ്ബിലേക്കെത്താം..!

ഓണം with ഈണം ..!!

2009-08-19T01:18:00.000-07:00

പൊന്നിൻ ചിങ്ങമാസം പിറന്നു… ജാതിമതഭേദമെന്യേ, ലോകമെമ്പാടുമുള്ള മലയാളികൾക്കിത് സന്തോഷത്തിന്റേയും ആഘോഷത്തിന്റേയും ദിനങ്ങൾ….!

നിങ്ങളോടൊപ്പം ഈ ഓണം കൊണ്ടാടാൻ ഗാനസദ്യയുമൊരുക്കി “ഈണ”വുമെത്തുകയാണ്. ഞങ്ങളുടെ ആദ്യഗാനോപഹാരം സമ്പൂർണ്ണവിജയമാക്കിമാറ്റിയ, അതിലെ ഗാനങ്ങളെ നെഞ്ചേറ്റിലാളിച്ച, നല്ല നിർദ്ദേശങ്ങളിലൂടെ ഞങ്ങൾക്ക് നേർവഴികാട്ടിയ നല്ലവരായ എല്ലാ സംഗീതാസ്വാദകരോടും “ഈണ”ത്തിന്റെ ഹൃദയം നിറഞ്ഞ നന്ദി അറിയിക്കട്ടെ . വരും സംരംഭങ്ങളിലും നിങ്ങളുടെ ഹൃദയം നിറഞ്ഞ സഹകരണം പ്രതീക്ഷിച്ചുകൊണ്ട്

“ഓണം with ഈണം” എന്ന മിനി-ആൽബം ഓണത്തിനോടനുബന്ധിച്ച് ആഗസ്റ്റ് അവസാന വാരം പുറത്തിറക്കുകയാണ്.നിങ്ങളുടെ ഇഷ്ടഗായകർ ആലപിക്കുന്ന ഈ ഗാനങ്ങളെല്ലാം കേട്ട് നിങ്ങളുടെ വിലയേറിയ അഭിപ്രായങ്ങൾ അറിയിക്കണമെന്ന് അഭ്യർത്ഥിക്കുന്നു..!

ഓണത്തിനു റിലീസ് ചെയ്യുന്ന ഈ ആൽബത്തിലെ പാട്ടുകൾ ..!
മലയാളത്തൊടി നീളേ - രാജേഷ് രാമൻ
ഓണം പൊന്നോണം - നോബിപ്രസാദ്
ആരോ കാതിൽ പാടി- ദിവ്യ മേനോൻ
ശ്രാവണം - തഹ്സീൻ മുഹമ്മദ്.
ഓർമ്മകൾ - ഷൈല രാധാകൃഷ്ണൻ
ആരോ കാതിൽ - പ്രദീപ് ചന്ദ്രകുമാർ

------------------------------------------------------
ഈണം വാർത്തകൾ പത്രങ്ങളിൽ..!

കേരള കൗമുദി -ജൂലൈ 22,2009

ചിത്രങ്ങളിൽ ക്ലിക്കി വലുതാക്കി വായിക്കുക.

ഇന്ത്യൻ എക്സ്പ്രസ് -ജൂലൈ 14,2009

ചിത്രങ്ങളിൽ ക്ലിക്കി വലുതാക്കി വായിക്കുക.

വെബ് ദുനിയ,ജൂലൈ1,2009

ചെറായി മീറ്റിനോടനുബന്ധിച്ചു നടന്ന ഈണത്തിന്റെ സിഡി പ്രകാശനം

ചെറായി മീറ്റിന്റെ റിപ്പോർട്ടിൽ നിന്ന് :- “ബ്ലോഗിലെ ഒരു കൂട്ടം കലാകാരന്മാരുടെ കൂട്ടായ്മയിൽനിന്നുരുത്തിരിഞ്ഞ ഈണം സി. ഡി യുടെ ഔപചാരികമായ പ്രകാശനകർമ്മവും, പരിചയപ്പെടുത്തലും നടന്നു. പ്രൌരപ്രമുഖനും, ഈ മീറ്റിന്റെ രക്ഷാധികാരിയും, ലതിച്ചേച്ചിയുടെ ഭർത്താവുമായ ശ്രീ.സുഭാഷേട്ടനു, അപ്പു ; ഈണം സി ഡി യുടെ ആദ്യപ്രിന്റ് സമ്മാനിച്ചുകൊണ്ട് പ്രകാശനം ചെയ്തു.“

ഈണത്തിന്റെ വരും കാല സംരംഭങ്ങൾ..!
1.ഈണം ടീം ഒരു ലവ് സോങ്ങ് കൊമേഴ്സ്യൽ ആൽബത്തിനു പിന്നണിയിൽ അണിനിരക്കുന്നു.“ഓർമ്മകൾ“ എന്ന ഈ ആൽബം ജനുവരി 2010ൽ പുറത്തിറങ്ങുമെന്ന് പ്രതീക്ഷിക്കുന്നു.
2.മലയാളം ബ്ലോഗിൽ നിന്നും 10 കവിതകളുടെ ഒരു കവിതാ ആൽബം.നിർദ്ദേശങ്ങൾ പ്രതീക്ഷിക്കുന്നു.

ഈണത്തെ നെഞ്ചിലേറ്റിയവർക്ക് ഒരിക്കൽ കൂടി നന്ദി..!

ചിത്രം :-സജ്ജീവേട്ടൻ.

ഈണം ചെറായിക്കൂട്ടത്തിലേക്ക്..!!

2009-07-10T04:45:00.000-07:00

മലയാളത്തിലെ ആദ്യ സ്വതന്ത്രസംഗീത സംരംഭമായ ഈണം ഇന്റർനെറ്റിന്റെ അതിരുകൾ കടന്ന് നിങ്ങളുടെ കൈകളിലേക്കെത്തുന്നു.ഈ വരുന്ന 26ആം തീയതി ചെറായിയിൽ വച്ച് നടക്കുന്ന ബ്ലോഗ് സുഹൃദ് സംഗമത്തിൽ ഈണത്തിന്റെ സിഡി പ്രകാശനം ചെയ്യുകയാണ്.ഈണത്തിനെ സ്വാഗതം ചെയ്യുന്ന ചെറായി സംഗമത്തിലെ അംഗങ്ങള്‍ക്ക് നന്ദി.

തികച്ചും ഒരു പരീക്ഷണമായിരുന്നതിനാൽ വളരെയധികം അകാംക്ഷയോടെയായിരുന്നു ഈണത്തിന്റെ വെബ്ബ് റിലീസ് നടത്തപ്പെട്ടത്. മൂവായിരത്തിലധികം വ്യത്യസ്ഥരായ ആളുകൾ ഈണത്തിന്റെ വെബ്ബ് സന്ദർശിക്കുകയുണ്ടായി.പത്ത് ദിവസത്തിനുള്ളിൽ ഒന്നേകാൽ ലക്ഷം ഹിറ്റുകളും18 ജിബിയോളം പാട്ടുകൾ ഡൗൺലോഡും ചെയ്യപ്പെട്ട “ഈണം“ എന്ന സംരംഭം കൂടുതൽ പേരിലേക്ക് എത്തിച്ചതിനു ബൂലോഗത്തിനും ഇന്റർനെറ്റ് മലയാളത്തിനുഭിമാനിക്കാം.

ബ്ലോഗ് എന്ന മാധ്യമത്തെ കൂടുതൽ ഫലപ്രദമായി ഉപയോഗിക്കാൻ കഴിഞ്ഞു എന്നതിന്റെ ചാരിതാർത്ഥ്യം പങ്കുവയ്ക്കുന്നതിനോടൊപ്പം ഈണത്തിന്റെ പിന്നണിയിലും മുന്നണിയിലും നിന്ന് ഈ സംരംഭത്തെ കൂടുതൽ ജനകീയമാക്കിത്തീർത്ത ഓരോരുത്തരോടുമുള്ള നന്ദി ഈ അവസരത്തിൽ അറിയിക്കുന്നു.തുടർന്നും പാട്ടുകൾ കേൾക്കുക.നിങ്ങളുടെ വിലയേറിയ നിർദ്ദേശങ്ങൾ പങ്കു വയ്ക്കുക.

അറിയിപ്പ് :- ഈണം എന്ന സംരംഭം തികച്ചും സ്വന്തത്രസംഗീതത്തെ പ്രോത്സാഹിപ്പിക്കുവാനുള്ളതിനാല്‍ ഇതിന്റെ സിഡികള്‍ കൊമേഷ്സ്യല്‍ സാധ്യകള്‍ ഇല്ലാതെയാണു പുറത്തിറക്കുന്നത്.ആര്‍ട്ടിസ്റ്റുകള്‍ക്കും ആവശ്യക്കാര്‍ക്കുമൊഴിച്ച് സിഡികള്‍ പുറത്തിറക്കുവാന്‍ നിര്‍വ്വാഹമില്ലാത്തതിനാല്‍ത്തന്നെ ആവശ്യക്കാര്‍ അറിയിക്കുക.

ഈണത്തിലെ ഗാനങ്ങള്‍
1.കേള്‍ക്കാനിവിടെ ക്ലിക്കുക.
2.ഡൌണ്‍ലോഡാനിവിടെ ക്ലിക്കുക.

കൂടുതല്‍ ചെറായി അറിയിപ്പുകള്‍ ഇവിടെ
എല്ലാവരേയും ചെറായിയില്‍ കാണാമെന്ന പ്രതീക്ഷയോടെ..!
ഈണം..!

ചിത്രം:- നന്ദകുമാർ

ഈണം - റിലീസിംഗ് വാർത്ത..!!

2009-06-30T14:22:00.000-07:00

പ്രിയരേ...ഈണത്തിലേക്ക് നിങ്ങളെ ഓരോരുത്തരേയും സ്വാഗതം ചെയ്യുന്നു..! നേരത്തേ അറിയിച്ചിരുന്നത് പോലെ ജൂണിൽത്തന്നെ ഈണം റിലീസ് ചെയ്യുക എന്നത് ഒരു സ്വപ്നം പോലെ സാക്ഷാത്ക്കരിക്കുവാൻ സഹായിച്ച എല്ലാ‍വർക്കും ഒരിക്കൽ കൂടി നന്ദി..!

ഈണം -ഗാനങ്ങള്‍ -ഒരു പരിചയം.

2009-06-05T08:28:00.000-07:00

പ്രിയരേ..
ഈണത്തിനെ പ്രോത്സാഹിപ്പിക്കുന്ന എല്ലാവർക്കുമായി ഈണത്തിലെ ഗാനങ്ങളുടെ ആദ്യ ടീസേർസ് സമർപ്പിക്കുന്നു.പാട്ടുകൾ പിന്നണിയിൽ സ്റ്റുഡിയോ ക്വാളിറ്റിയിൽ തയ്യാറാ‍യിക്കൊണ്ടിരിക്കുന്നു.
നാടൻപാട്ട്,ദു:ഖഗാനം,തത്വചിന്ത,ഉത്സവഗാനം,അർദ്ധശാസ്ത്രീയം,ഭാവഗീതം,താരാട്ട്,
യുഗ്മഗാനം,കാമ്പസ് ഗാനം എന്നീ വിവിധ വിഭാഗങ്ങളിൽ തയ്യാറാക്കിയ 9 ഗാനങ്ങളാണ് ഈണത്തിൽ ഉൾപ്പെടുത്തിയിരിക്കുന്നത്.ജൂൺ അവസാന വാരം പണികളൊക്കെ പൂർത്തിയാക്കി എല്ലാ ശ്രോതാക്കളിലേക്കും പാട്ടുകൾ എത്തിക്കാം എന്ന പ്രതീക്ഷയിലാണു ഞങ്ങൾ.

ഈണത്തിനു വേണ്ടിയൊരുങ്ങുന്ന പുതിയ വെബ്ബിലൂടെത്തന്നെ എല്ലാപാട്ടുകളും സൗജന്യമായിത്തന്നെ കേൾക്കാനും ഡൗൺലോഡ് ചെയ്യാനും സാധിക്കുന്ന തരത്തിലാണ് ഈണത്തിന്റെ റിലീസിംഗ് തയ്യാറാക്കുന്നതെങ്കിലും ആവശ്യക്കാർക്ക് ഒരു ചെറിയ തുകയിൽ(50രൂപ)ഓഡിയോ സിഡി വേർഷൻ കൂടി ലഭ്യമാക്കണമെന്ന് കരുതുന്നു.താല്പര്യമുള്ളവർ കമന്റിലൂടെയോ eenam2009@gmailഡോട്കോം എന്ന വിലാസത്തിൽ ഒരു മെയിലായോ അറിയിക്കുവാനപേക്ഷ.ഓഡിയോ സിഡി വാങ്ങുന്നവര്‍ക്ക് എമ്പീത്രീ കമ്പ്രഷന്‍ ഫോര്‍മാറ്റിലല്ലാത്ത ഗാനങ്ങളുടെ ഒറിജിനല്‍ പതിപ്പ് തന്നെ കരസ്ഥമാക്കാവുന്നതാണ്.

ഈണം 2009ലെ ആർട്ടിസ്റ്റുകളെക്കൂടി നിങ്ങൾക്ക് പരിചയപ്പെടുത്തുന്നു.

ഗാനരചന :- ഡോണാ മയൂര,ഗീതാ ഗീതികൾ, ചാന്ദ്നി, ദേവിപിള്ള, പാമരൻ , ചെറിയനാടൻ , ജി മനു & ബൈജു ടി

സംഗീതം:- രാജേഷ് രാമൻ , ബഹുവ്രീഹി , എൻ എസ് പണിക്കർ & ചെറിയനാടൻ

പാടിയവർ :-ദിവ്യ മേനോൻ ,ദിവ്യ പങ്കജ്, രശ്മി നായർ, ശാന്തി , ശ്രീകാന്ത് ,രാജേഷ് രാമൻ ,സുരേഷ്, സതീഷ് മേനോൻ , ജോ & കിരൺ .

അഡ്വൈസർ & കൺസൾട്ടന്റ് :- എതിരൻ കതിരവൻ

വെബ്ബ് സഹായം :- കെവിൻ സിജി

ഡിസൈൻ & ലോഗോസ് :- നന്ദകുമാർ & താഹാനസീർ

ഈണത്തിന്റെ 9 ഗാനങ്ങളുടേയും ഒരു ചെറിയ പതിപ്പ് താഴെയുള്ള പ്ലേയർ വഴി ശ്രവ്യമാകുന്നതാണ്. സ്റ്റുഡിയോ റെക്കോര്‍ഡിംഗ് വേളയില്‍ എടുത്ത റഫ് വോക്കല്‍ വേര്‍ഷനുകളാണിത്.ഹെഡ്ഫോണ്‍/ഇയര്‍ ഫോണ്‍ വഴി കേള്‍ക്കാന്‍ താല്പര്യപ്പെടുന്നു.

Dear Friends,

Thanks for your continuous support and encouragement on EENAM 2009 - A Freely Downloadable Malayalam Musical Album , a first of this kind within the Malayalam blogosphere/Internet. EENAM 2009 has 9 Malayalam songs of different genres falling into Folk, Pathos, Philosophical, Festival, Semi Classical, Lullaby, Melody, Duet, Fast campus song categories.

We have made tremendous progress with the studio recordings and orchestration, and as per plan the album will be released by end of June 2009.The album is freely downloadable from Internet. We are also planning to release and distribute an audio CD version for Rs50. Do let us know your interest through blog comments and/or by sending us email at eenam2009@gmail.com.

Presenting the TEASERS for the 9 songs below (Best heard with headphones)! This a compilation of audio clips taken during the recording sessions . Final Vocal recording/editing/mixing is in progress.

Do let us know your valuable comments! Looking forward to your esteemed support!

ഡൗൺലോഡ് ഇവിടെ (Right Click and choose Save target as to save as an MP3)

ഈണത്തിന്റെ മൂന്നു ലോഗോകൾ താഴെ തയ്യാറാക്കിയിരിക്കുന്നു.നിങ്ങളുടെ വായനക്കാർക്ക് ഈണത്തിനെ പരിചയപ്പെടുത്തുവാൻ ഇതുപയോഗിക്കുക.ചിത്രങ്ങൾ ഡൗൺലോഡ് ചെയ്ത് ബ്ലോഗറിൽ ചേർത്ത് ലിങ്ക് കൊടുക്കുമ്പോൾ ദയവായി www.eenam.com എന്ന് കൊടുക്കുക

നന്ദി ആൽബം ടീം..!!

ലോഗോ ഡിസൈൻ :- താഹാനസീർ

ഈണത്തിന്റെ വിഷുക്കൈനീട്ടം.

2009-04-13T20:17:00.000-07:00

ഈണം - മലയാളത്തിലെ ആദ്യ സ്വതന്ത്ര സംഗീത ആൽബം (ജൂൺ - 2009)

സ്വതന്ത്രമായി ആർക്കും ഇന്റർനെറ്റിലൂടെ പാട്ടുകൾ കേൾക്കാനും ഡൗൺലോഡ് ചെയ്യാനുമായി തയ്യാറാക്കുന്ന മലയാളത്തിന്റെ ആദ്യ സംരംഭം.വിവിധദേശങ്ങളിൽ ജോലിനോക്കുന്ന സംഗീത പ്രേമികളായ മലയാളികളുടെ ദീർഘനാളത്തെ ആഗ്രഹത്തിന്റെ സാക്ഷാത്കാരം.

ഏവരുടേയും പിന്തുണയും അനുഗ്രഹവും പ്രതീക്ഷിച്ചു കൊണ്ട് ഈണത്തിന്റെ വകയായി ഒരു ചെറിയ വിഷുക്കൈനീട്ടം ഇതാ ഇവിടെ...!

രചന : ജി നിശീകാന്ത്
സംഗീതം : ബഹുവ്രീഹി
ആലാപനം : രാജേഷ് രാമൻ

ഡൗൺലോഡ് ഇവിടെ (Right Click and choose Save target as to save as an MP3)

ആദ്യമായ് കിട്ടിയ കൈനീട്ടം, ഇന്നും
ഓർമ്മതൻ മുറ്റത്തെ കളിയാട്ടം
ഒരുകണിക്കൊന്നപോൽ പുഞ്ചിരിച്ചവളെന്റെ
ഹൃദയത്തിനേകിയ കൺനീട്ടം, ഞാൻ
ഒരിക്കലും മറക്കാത്ത കൈനീട്ടം

തൊട്ടുവിളിച്ചുണ്ണിക്കണ്ണനേക്കാണിച്ചു
മുത്തശ്ശനേകിയ കൈനീട്ടം
മിഴിയൊപ്പിയമ്മയെൻ കൈക്കുമ്പിളിൽ തന്ന
കണ്ണീരിനുപ്പുള്ള കൈനീട്ടം, എന്റെ
കരളിലെ നൊമ്പരക്കൊടിയേറ്റം

ആണ്ടിലൊരിക്കൽ വരാറുള്ളൊരച്ഛന്റെ
വാൽസല്യ ചുംബനക്കൈനീട്ടം
ആയിരം കഥചൊല്ലിത്തന്ന മുത്തശ്ശിതൻ
വെറ്റിലക്കറയുള്ള കൈനീട്ടം, എല്ലാം
ഓർമ്മയാം കാലത്തിൻ കതിരാട്ടം.

ഈണം - പ്രഥമ മലയാള ബ്ലോഗ് സംഗീത ആൽബം (ജൂൺ - 2009)

2009-04-12T20:25:00.000-07:00

വാണീജ്യ താല്‍പ്പര്യങ്ങളോ സാമ്പത്തിക ലാഭമോ ഇല്ലാതെയുള്ള “ഫ്രീ മ്യൂസിക്“ എന്ന ആശയം വർഷങ്ങളായി ബ്ലോഗിലെ സംഗീത മേഖലയിൽ പ്രവർത്തിക്കുന്നവരുടെ ഒരു സ്വപ്നമായിരുന്നു.കാലാകാലങ്ങളായി ഉരുത്തിരിഞ്ഞുവന്ന ഈ ആശയം ഉൾക്കൊണ്ടുകൊണ്ട് മലയാളത്തിന്റേത് മാത്രമായ ഒരു ‘സ്വതന്ത്ര സംഗീത ആൽബ’ത്തിനു രൂപം കൊടുക്കുവാനുള്ള ചിന്തകൾ പലപ്പോഴായി സൗഹൃദ കൂട്ടായ്മളിൽ ഉയർന്നു വന്നിരുന്നു.ആ സ്വപ്നം ഇവിടെ സാക്ഷാത്കരിക്കപ്പെടുകയാണ്.പല ഭൂഖണ്ഡങ്ങളിലായി പല രാജ്യങ്ങളിൽ ജോലിനോക്കുന്ന,പരസ്പരം നേരിൽ കാണാതെ,ഇന്റർനെറ്റിന്റെ മാത്രം സാദ്ധ്യതകൾ ഉപയോഗിച്ചുകൊണ്ട് ഒത്തുചേർന്ന ഒരു കൂട്ടം സംഗീത പ്രേമികൾ,ഇതാ അങ്ങനെയൊരാൽബം കാഴ്ചവയ്ക്കാനൊരുങ്ങുന്നു.

ഈ വരുന്ന 2009 ജൂണിൽ പ്രസിദ്ധീകരിക്കാമെന്നു പ്രതീക്ഷിക്കപ്പെടുന്ന പത്തു ഗാനങ്ങൾ അടങ്ങിയ ഈ ആൽബം പബ്ലീഷ് ചെയ്യപ്പെടുന്നതോടെ ആദ്യത്തെ മലയാള ബ്ലോഗ് സംഗീത ആൽബം എന്ന ആശയവും ഇവിടെ പൂർണ്ണമാവുന്നു. പൈറസിയുടെ പ്രശ്നങ്ങളില്ലാതെ സ്വതന്ത്രമായി അർക്കും ഡൗൺലോഡ് ചെയ്യാനും ഓഡിയോ സ്ട്രീമിംഗിലൂടെ അവ കേൾക്കാനും അവസരമൊരുങ്ങുകയും ചെയ്യുന്നു എന്ന പ്രത്യേകത കൂടിയുണ്ടിതിന്.

ഗ്രാമീണം,വേദാന്തം,ആർദ്ധശാസ്ത്രീയം,താരാട്ട്,വിഷാദം,ഉത്സവഗാനം,പ്രേമഗാനം,ഭാവഗീതം,കലാലയഗീതം എന്നീ വിഭാഗങ്ങളിലായി ബ്ലോഗിലെ പ്രതിഭാധനരായ എഴുത്തുകാർ രചിച്ച്,ബ്ലോഗുകളിൽ തന്നെ സംഗീതസംവിധാനത്തിൽ കഴിവുതെളിയിച്ചവർ ചിട്ടപ്പെടുത്തി,നാം അറിയുന്ന നമ്മുടെ ബ്ലോഗ് ഗായികാ ഗായകന്മാർ ആലപിക്കുന്ന പത്തു ഗാനങ്ങളുടെ ശേഖരമായ ഈ ആൽബത്തിന്റെ വർക്കുകൾ അണിയറയിൽ പൂർത്തിയാവുന്നു. ഒരോ സംഗീതപ്രേമികളുടേയും നിസ്സീമമായ സഹകരണമുണ്ടെങ്കിൽ ഈ സംരംഭം തുടർന്നുപോകാനാകുമെന്നാണ് ഞങ്ങളുടെ പ്രതീക്ഷ.

ആൽബത്തിനു പേരു നിർദ്ദേശിച്ച എല്ലാവർക്കും നന്ദി.അകത്തും പുറത്തുമായ കിട്ടിയ നിർദ്ദേശങ്ങളിൽ നിന്ന് “ഈണം“ എന്ന പേരു തിരഞ്ഞെടുത്തിരിക്കുന്നു എന്ന് സഹർഷം അറിയിക്കട്ടെ..നന്ദി..!

ആൽബത്തിന്റെ ലോഗോ മനോഹരമായി രൂപകല്പന ചെയ്ത പ്രിയ സുഹൃത്ത് താഹാനസീറിനു നന്ദി.

സസ്നേഹം
ആൽബം ടീം